25 ST: SV Werder - VfB Hubbgard

Anstoß: Sa. 15.03.2014, 15:30 Uhr

ST 1 nach Schneider – SV Werder Bremen – VfB Stuttgart

Sodele jetzt hemmer den Salad. Nur noch nein Spiel (des ledschde gegen die Voderöschdereicher zähle mr hier gar nemme mid), ond es fehlet emmer noch an haufe Punkt om die Klass zom halde. Stücker 20 hemmer grade mal uffem Kondo, omd des nach nun schon feifazwanzig Partie.

S´isch ja et so das mr des beim VauEfBee net gwähnt wäre – also nix uffem Konto zu ham – aber bisher wars hald meischdens nur des Kondo uff der Landesschirokass wo´s et so guat ausgesehe hat, ond uns ständig Kommer und Sorga breitet.
Nu hemmer au no zu wenig in der Ligatabell und des wo mr doch eigentlich nägschd Seison wieder agreiffa wollded om an die fätte Fleischdöpf von der Tschämbionsliäg zom komma.


Heilligs Blechle der Klepperlesveroi vom Neggar lässd in derre Saison aber au gar nix aus om seine dreie Ahänger au no des ledschde bissle Schlof zom raube.
Schnell hen se gmergt das der jonge Drainer Schneider au ed besser schaffe ko als der alte Drainer Labbadia. Sie hen zwar jetzt a guade Atmosfär em Draining ond in der Kabine, aber gwenne den se uffem Platz no gar nemme mehr.

Es war also glar wie Klosbrüh, es muss amole wieder en neier Übongslaider her. Am beschden Oiiner der die hochbezahlde Grasdackel von Profis mal recht am Schlawidchen packt ond amole ordentlich durchschittlät.

Jetzt hen se Woch für Woch überlegt wie se em Thomas (des isch der Langhaarschlamber-Drainer wo ledschde Saison no die jonge Hipfer von der B-Jugend zom Meischder gmocht had) also wie se dem Schneider des schonend rieberbringa kennet das es doch eigentlich gar koin Wert mehr had wenn er weiderhin uff seinen Verdrag pocht und weiderhin jeden Tag um zehne Morgens zom Drainiera kommt.

Mit a paar Psychotrcks wolldet se dass dr Kerle von sich aus soin Hud nakait, oder des Handtüchle wirf oder was auch emmer. Nur hodd der des net doa, der had nähmich au scho en Gschmagg gfonda am gudde Salär von em Bundesligadrainer des jeden Monad schwäbisch pünktlich uff sei Sparkassebüchle kommd.

Nachdem se no aber au no gega die allerledschde in dere Liga et gwonna hen, ond der Hallschlag-Fredi scho seine Kumbbels Krassimir ond Zvonimr a gsimmst had, da sen die Fans uff´d Barrikade nuff ond hem dem amole zeigt wo der Bardel der Mooschd herhold.

Also nur die Uldras ond die von der Ä-Ähn –BeWe-Dribühn, weil die von der Haupd-Dribühn mussded ja leider scho a vierdel Schdond vor em Abpfiff aus em Schadion gange, om schnell no der Daimler aus em gleichnamige Parkhaus fahre zu könne. Da bressierts dann nadürlich wie´d sau. Des aber nur am Rande.


Zrück zum Thema: Heut Morga hen se en Schneider nun doch kindiga missa, der Dagdieb had nämlich woiderhin koina Anstalde gmacht von sich aus zom gange.
Jetzt missed se beim VauEffBee nebe dem Bruno au no den Thomas bis 2015 zahle, ond au no derre boida Drainerstab unterhalda. Jesses Godd was des wieder elles koschd!!!
Ond des wo ma doch gega Berlin ond Braunschweig grad erschd 20 Tausend Kärdle verschenkt hat om des jeses mässige ond sindhafd teure Daimler-Schdadion voll zom kriega.

So ond nachdem des so weit war, ond se ja plötzlich ohne en Drainer daschdandet, da had dann der Präsident en subber Oifall ghabt. Der had soin Äbbel-Däbblet genomma, oder wars en Läbbdop oder gar a Smartfohn – woi´s nemma gnau, isch au egal – ond hat sich dann bei Transfermarkt.de eigloggt om zum gucka was es denn überhaupt so für Drainer uff em Markt gibd.

Aaaah jetzt wois ich´s wieder - des war gar koi Gerät vom Wahler wo der ins Inderned isch, der isch an den alde PC vom Vorgänger Mauser gange, da isch nämlich noch dem Pauerbootle-Mäuser soin User-Account dauerhaft gspeichert. No konnd der Wahler dann als Benutzer“ Mauldasch“ gugge ohne sich selbsch regischdriera zom missa. Der isch hald a Käppsele, der Wahler.


Ond dann hen se da gseha das der oine Holländer wo frieher bei Schalke gschafft hat, das der grad gar koi Gschäffd mehr hat ond Zeid häd. No mussd der Bobic dem arufe, was dem Fredi aber mal gar et passt had. Die hen doch schon Händel ghät als se mal zsamme in Berlin gschafft hen. Egal, arufe mussd der dem trotzdem ond da hat der Stevens glei zugsagt weil der wois das dui schwäbische Küche großartig isch, er jeden Dag a warme Budderbrätzel bekommt ond er des Essa aus Griechenland oifach au nemme riecha kann.

Soviel zur kurzen Vorgeschichte, nun zum Spiel:

Also dr Knurrer aus Kerkrade isch ja bekannt dafir a arg kondrollierde Offensive zom spiela. Deswege werde se em Daimlerstadion die Fünf-Meter-Reim no glei mid Kunschdrase auslege, weil do jetzt emmer alle elf Mann von de Schduagarder stande werdet.
Die Gäschd von der Weser werdet onder Dutt au eher in dere Spielhälfd bleiba, ond so wird au endlich amol der Mittelkreis gschont, wo sonschd emmer so ramboniert isch ond deswega ständig gflickt werde muss.

Da der Ulreich aber koin oinziga Ball kurz naus spiel ka, ond statt dessen die Murmel emmer wie en Gschuggder über die Middellinie drescha muss, wird der Ball dann von nem Bremer saumäsig oglücklich abgfälschd ond landet dann au no dene ihrm oigenen Kaschde.
Es wird also en 0-1 Auswärtssieg. So oifach isch des! ond des war´s dann au schon von mir.


Ansonschden gilt: Wenn ihr nix wisse wellet - fraged ruhig mi. ;)


Ond zum Schluß no des ibliche Ridual:
Auf goaht´s Schduargard kämpfe ond siega.
1893 huup, huup …
Dieser Beitrag wurde zuletzt von Luebke am 09.03.2014 um 23:09 Uhr bearbeitet